Tess J S
അണ്ണാന്‍ വര്‍ഗത്തിലെ ഏറ്റവും വലിപ്പമുള്ള ജീവിയാണ് മലയണ്ണാന്‍. മൂന്നടിയോളം നീളമുള്ള ഇവയുടെ ശരീരത്തിന്റെ ഒന്നരയടിയോളം രോമാവൃതമായ വാലാണ്. റാറ്റുഫ ഇന്‍ഡിക എന്നതാണ് ഇവയുടെ ശാസ്ത്രീയനാമം. ഇന്ത്യയില്‍ വ്യാപകമായി കണ്ടുവരുന്ന മലയണ്ണാന്‍ കേരളത്തില്‍ പശ്ചിമഘട്ട മലനിരകളില്‍ ധാരാളമായുണ്ട്.
പശ്ചിമഘട്ടത്തില്‍ കണ്ടുവരുന്ന ഇവയുടെ ശരീരത്തിന് ഇളം ചുവപ്പ് നിറവും വാലിന് കറുപ്പ് നിറവുമാണുള്ളത്. രണ്ട് കിലോഗ്രാം ഭാരമാണ് ഏകദേശമുണ്ടാവുക. പഴങ്ങളും, പൂക്കളും, ഇലകളുമാണ് ഇവയുടെ ഭക്ഷണം. എപ്പോഴും വളര്‍ന്നുകൊണ്ടിരിക്കുന്ന പല്ലുകള്‍ ഇവയുടെ സവിശേഷതയാണ്. മഹാരാഷ്ട്രയുടെ സംസ്ഥാനമൃഗമാണ് ഇവ. ആവാസവ്യവസ്ഥയിലെ തകരാറുമൂലം വംശനാശഭീഷണി നേരിടുന്ന ഇവയെ ഐ. യു. സി. എന്‍ റെഡ് ഡേറ്റാ ബുക്കില്‍ ഉള്‍പ്പെടുത്തിയിരിക്കുന്നു.
ഇരുപത് വര്‍ഷം വരെയാണ് ഇവയുടെ ശരാശരി ആയുസ്സ്. 29 മുതല്‍ 35 ദിവസം വരെയാണ് ഗര്‍ഭകാലം. ഒരു പ്രസവത്തില്‍ രണ്ട് കുഞ്ഞുങ്ങള്‍ വരെയാണ് ഉണ്ടാവുക. അതിരാവിലെയും സൂര്യാസ്തമയത്തിനു തൊട്ടുമുന്‍പുമാണ് ആഹാരം തേടി ഇക്കൂട്ടര്‍ പുറത്തിറങ്ങുന്നത്. ലോകത്തിലെ തന്നെ അണ്ണാന്‍ വര്‍ഗത്തിലെ ഏറ്റവും ശാരീരിക സൗന്ദര്യമുള്ളവരാണ് ഇന്ത്യന്‍ മലയണ്ണാന്‍.
