Tess J S
നീലഗിരുകുന്നുകളില്‍ കണ്ടെത്തിയതിനാല്‍ നീലഗിരി താര്‍ എന്ന പേരില്‍ അറിയപ്പെടുന്നു. പശ്ചിമഘട്ടത്തില്‍ മാത്രം കണ്ടുവരുന്ന ഇവ തമിഴ്‌നാടിന്റെ സംസ്ഥാന മൃഗം കൂടിയാണ്. സമുദ്രനിരപ്പില്‍ നിന്ന് 8000 അടി ഉയരത്തില്‍ വിഹരിക്കുന്ന വരയാടുകളെ ഇടുക്കി ജില്ലയിലെ ഇരവികുളം ദേശീയോദ്യനത്തില്‍ ധാരളമായി കാണുവാന്‍ കഴിയും. തിരുവനന്തപുരത്തെ പേപ്പാറ വന്യജീവി സങ്കേതത്തിലും, ഗവി, സൈലന്റ് വാലി എന്നിവിടങ്ങളിലും വിരളമായി ഇവ കാണപ്പെടുന്നു.
വരയാടിന്റെ ശരീരഭാഗത്ത് തവിട്ടുകലര്‍ന്ന ചാരനിറവും, വയര്‍ഭാഗത്തിലും കഴുത്തിലും വെള്ള നിറവുമാണുള്ളത്. ചെങ്കുത്തായ മലനിരകളെ അനായാസം കീഴടക്കുവാനുള്ള ശരീരപ്രകൃതി ഇവയ്ക്കുണ്ട്. ആണ്‍-പെണ്‍ മൃഗങ്ങള്‍ക്ക് ചെറിയ പരന്ന കൊമ്പുകള്‍ കാണപ്പെടുന്നു. നാലടിയോളം ഉയരവും 90 കി. ഗ്രം വരെ ഭാരവും ഇവയ്ക്കുണ്ടാകും. പാറക്കെട്ടുകളിലെയും മലഞ്ചെരിവുകളിലെയും പച്ചപ്പുല്ലാണ് ഇഷ്ടാഹാരം. ഇവയുടെ ഗര്‍ഭകാലം 180 ദിവസമാണ്. ഒരു കുഞ്ഞാണ് ഒരു പ്രസവത്തില്‍ പതിവ്. ഇവയുടെ ശരാശരി ആയുസ്സ് മൂന്നരവര്‍ഷമാണ്. ഒമ്പത് വയസ്സുവരെയും ചില വരയാടുകള്‍ ജീവിക്കാറുണ്ട്. മനുഷ്യരോട് ഇണങ്ങുന്ന സ്വഭാവമാണ് ഇവയ്ക്കുള്ളത്. അനുയോജ്യമായ വാസസ്ഥലത്തിന്റെ അപര്യാപ്തത വരയാടുകളുടെ എണ്ണത്തെ ഗണ്യമായി കുറച്ചു. വംശനാശഭീഷണി നേരിടുന്ന ജീവികളുടെ പട്ടികയില്‍ ഐ. യു. സി. എന്‍ 2010 ല്‍ വരയാടുകളെ ഉള്‍പ്പെടുത്തുകയുണ്ടായി.
ബൊവിടെ കുടുംബത്തില്‍ ഉള്‍പ്പെടുന്ന ഇവയുടെ ശാസ്ത്രീയനാമം നീല്‍ഗിരിട്രാജസ് ഹൈലോക്രിയസ് എന്നതാണ്.
