Tess J S
കറുപ്പും വെളുപ്പും ഇടകലര്‍ന്ന വരകളുള്ള ഇവയെ വരയന്‍ കുതിര എന്നും അറിയപ്പെടുന്നു. ആകര്‍ഷകമായ വരകള്‍ ശത്രുകളില്‍ നിന്നും രക്ഷനേടാന്‍ ഇവയെ സഹായിക്കുന്നു. ആഫ്രിക്കയിലെ സവന്നാ പുല്‍മേടുകളാണ് ഇവയുടെ ജന്മസ്ഥലം. കുതിരകളടങ്ങുന്ന ഇക്വിസ് എന്ന ജനുസ്സില്‍ ഉള്‍പ്പെട്ടവരാണ് സീബ്രകള്‍. മൂന്ന് തരം സീബ്രകളാണ് ഇപ്പോള്‍ ലോകത്താകെ അവശേഷിക്കുന്നത്. പര്‍വതസീബ്ര, ഗ്രേവിയുടെ സീബ്ര, സമതലസീബ്ര എന്നിവയാണ് മൂന്നിനങ്ങള്‍. ഇതില്‍ സമതലസീബ്രയുടെ ഉപവിഭാഗമായിരുന്ന ക്വാംഗാ എന്നയിനം വംശമറ്റുപോയി.
കൂട്ടത്തോടെ സഞ്ചരിക്കാന്‍ ഇഷ്ടപ്പെടുന്നവരാണ് സീബ്രകള്‍. പൂര്‍ണ്ണമായും സസ്യഭുക്കുകളായ ഇവ ആഹാരം തേടി 40 കിലോമീറ്റര്‍ വരെ സഞ്ചരിക്കാറുണ്ട്. ഒന്നരമീറ്ററോളം ഉയരമുള്ള ഇവയ്ക്ക് 400 കിലോഗ്രാം വരെ ഭാരമുണ്ടാകും. ഗ്രേവിയുടെ സീബ്രയാണ് ഏറ്റവും വലിയ സീബ്രയിനം. പര്‍വ്വതസീബ്രയും, ഗ്രേവിയുടെ സീബ്രയും എണ്ണത്തില്‍ വളരെക്കുറവാണ്.
സീബ്രകളുടെ ഗര്‍ഭകാലം പത്രണ്ട് മാസമാണ്. പ്രസവത്തില്‍ ഒരു കുഞ്ഞാണുണ്ടാവുക. കുഞ്ഞുങ്ങളെ സംരക്ഷിക്കുന്ന കാര്യത്തില്‍ പ്രത്യേകം ശ്രദ്ധയുള്ളവരാണ് ഇവര്‍. സമൂഹമായി ജീവിക്കാനിഷ്ടപ്പെടുന്ന ഇവയുടെ സംഘത്തെ നയിക്കുന്നത് കൂട്ടത്തിലെ മുതിര്‍ന്ന പെണ്‍ സീബ്രയാണ്. ആണ്‍ സീബ്രകളെയും പെണ്‍ സീബ്രകളെയും വേര്‍തിരിച്ചറിയുക എളുപ്പമല്ല.
